Пулемётчик Расов

И.А. Расов чужліс Кулӧмдін районса Лунпока грездын крестьянин семьяын. Великöй Отечественнöй война пансигӧн сылы вӧлі муртса 15 арӧс. Уджаліс-отсасис аскоддьöмъясыскӧд колхозын. 1943 вося октябрын том зонмӧс босьтісны армияӧ. Военнöй делö велӧдӧм бӧрын веськаліс Прибалтийскöй фронт вылӧ.

50-ӧд Гвардейскöй стрелкӧвöй дивизия сьӧкыд, ёсь тышъяс сорöн пыр водзӧ нырччис Восточнöй Пруссиялань. Би пыр и ва пыр лоис мунны пулемётчик И.А. Расовлы вӧрӧгӧс зыригӧн. Мыйта фашистӧс бырӧдіс повтӧм салдат. Асьсӧ жалиттӧг пыр уськӧдчыліс косьӧ медводдзаяс радын.

Курыд война колис ассьыс пас Иван Александровичлы: кыкысь ранитчыліс, ӧтчыд контузитчыліс. Восточной Пруссияын жӧ ӧти ыджыд кар (нимсӧ оз помнит) босьтігӧн коми боецӧс ранитіс разрывнöй пуля. Тӧлысъясӧн лои бурдӧдчыны уна госпитальын. И.А. Расовӧс вӧрӧгкӧд повтӧг тышкасьӧмысь пасйисны «За отвагу» медальöн. Победа суис салдатӧс Вӧлӧгда карса госпитальын.

Гортас воӧм бӧрын нин Иван Александровичлы сетісны ыджыд награда — Боевöй Гöрд Знамя орден. Демобилизуйтчӧм бӧрын И.А. Расов уджаліс видз-му овмӧсын. Ӧні пенсия вылын. Но весь кадсӧ оз колляв, водзмӧстчӧ ветеранъяслӧн районса котырын.

А. Морохин

Парма гор, 1997, Май 8 лун (50№).